ព័ត៌មានអំពីធនាគារហេតុការណ៍ និងតួលេខប្រវត្តិធនាគារ

ប្រវត្តិធនាគារ

ការិយាល័យកណ្តាល ធនាគារ អេស៊ីលីដា ភីអិលស៊ី

ដោយមានការជួយគាំទ្រពីអង្គការពលកម្មអន្តរជាតិ (ILO) និង កម្មវិធីអភិវឌ្ឍន៍អង្គការសហប្រជាជាតិ (UNDP) អេស៊ីលីដា ត្រូវបានបង្កើតឡើងនៅក្នុងខែមករា ឆ្នាំ១៩៩៣ ក្នុងនាមជាអង្គការក្រៅរដ្ឋាភិបាលមួយ មានទិសដៅអភិវឌ្ឍន៍មុខរបរខ្នាតតូចបំផុត និងខ្នាតតូច តាមរយៈការផ្តល់ឥណទានដោយស្ថាបនិកមួយក្រុមដូចខាងក្រោម ។ តាំងពីពេលចាប់ផ្តើមដំបូង អេស៊ីលីដាបានទទួលការគាំទ្រពីភ្នាក់ងារអភិវឌ្ឍន៍អន្តរជាតិសំខាន់ៗជាច្រើន ដូចមាននៅក្នុងតារាងកិត្តិយសដែលយើងខ្ញុំសូមថ្លែងអំណរគុណយ៉ាងជ្រាលជ្រៅ ។

ការពង្រីកបណ្ដាញប្រតិបត្តិការគ្របដណ្ដប់គ្រប់ខេត្ត-រាជធានី ក្នុងព្រះរាជាណាចក្រកម្ពុជា និងសមត្ថភាពរបស់ធនាគារ ក្នុងការរកប្រាក់ចំណេញដែលធានានូវនិរន្តរភាព គឺជាកត្តាធំពីរ ដែលធ្វើឱ្យក្រុមប្រឹក្សាភិបាល និងដៃគូអន្តរជាតិរបស់ខ្លួនសម្រេចថា ធនាគារ អេស៊ីលីដា គួរធ្វើការកម្លាយខ្លួនទៅជាធនាគារពាណិជ្ជ ។ ធ្វើបែបនេះ មិនត្រឹមតែជួយពង្រឹងស្ថិរភាពរចនាសម្ព័ន្ធផ្នែកច្បាប់ សម្រាប់បំពេញកាតព្វកិច្ចរបស់ខ្លួនពីមុនមកនោះទេ វាថែមទាំងផ្តល់ឱ្យធនាគារនូវជម្រើសកាន់តែច្រើនក្នុងការរកទុនបន្ថែម (ដូចជាការបន្ថែមដើមទុន ការទទួលប្រាក់បញ្ញើសាធារណៈ ឬការទទួលប្រាក់កម្ចីពាណិជ្ជកម្ម រវាងធនាគារដូចគ្នា) សម្រាប់គាំទ្រដល់ការពង្រីក ការផ្តល់សេវាមីក្រូហិរញ្ញវត្ថុ ដែលជាអាជីវកម្មស្នូលរបស់ខ្លួន ។

ដោយមានការជួយជ្រោមជ្រែងពីស្ថាប័នមួយចំនួនដូចជា ភ្នាក់ងារអភិវឌ្ឍន៍អន្តរជាតិនៃសហរដ្ឋអាមេរិក (USAID) កម្មវិធីអភិវឌ្ឍន៍វិស័យឯកជនតំបន់ទន្លេមេគង្គ (MPDF/IFC) និងកម្មវិធីអភិវឌ្ឍន៍អង្គការសហប្រជាជាតិ (UNDP) ធ្វើឱ្យកម្មវិធីកម្លាយខ្លួនរយៈពេលបីឆ្នាំមួយ ត្រូវបានលើកឡើងនៅឆ្នាំ១៩៩៨ ហើយសម្រេចជោគជ័យ ដោយទទួលបានអាជ្ញាប័ណ្ណជាធនាគារឯកទេស នៅក្នុងខែតុលា ឆ្នាំ២០០០ ។

នៅក្នុងដំណើរការកម្លាយខ្លួននេះ អង្គការក្រៅរដ្ឋាភិបាលអេស៊ីលីដាដើម បានបង្វែរទ្រព្យសកម្ម និងបំណុលក្នុងដៃអតិថិជន (ប្រាក់កម្ចីរយៈពេលវែង ដែលទទួលបានពីម្ចាស់ជំនួយ) ទៅកាន់ធនាគារ អេស៊ីលីដា ដែលទើបបង្កើតថ្មី ដោយប្តូរត្រឡប់ទៅវិញជាភាគហ៊ុន ៤៤,៩១% របស់ធនាគារស្មើនឹង ៤ លានដុល្លារអាមេរិក សមាគមបុគ្គលិកអេស៊ីលីដា (ក្រុមហ៊ុន អេ អេស អេ អ៊ីន្ស) ដែលបានបង្កើតឡើងដោយមូលនិធិរបស់បុគ្គលិក បានទិញភាគហ៊ុនចំនួន ៦,០៩% ហើយចំណែកដែលនៅសល់ ៤៩% ទៀតត្រូវបានបែងចែកទៅឱ្យភាគហ៊ុនិកបរទេសចំនួនបួនគឺ សាជីវកម្មហិរញ្ញវត្ថុអន្តរជាតិ (សាខារបស់ធនាគារពិភពលោក), DEG (ប្រទេសអាល្លឺម៉ង់), FMO និង ធនាគារទ្រីយ៉ូដូស (ប្រទេសហុល្លង់ដ៍) ។ នាពេលអនាគត ធនាគារ អេស៊ីលីដា អាចនឹងមានវត្តមាននៅក្នុងទីផ្សារភាគហ៊ុន ក្នុងពេលសមស្របណាមួយ ។

បន្ទាប់ពីបង្កើនដើមទុនរបស់ខ្លួនមួយទ្វេរជាបី ឡើងដល់ ១៣លានដុល្លារអាមេរិក ធនាគារអេស៊ីលីដា បានទទួលអាជ្ញាប័ណ្ណជាធនាគារពាណិជ្ជ នៅថ្ងៃទី០១ ខែធ្នូ ឆ្នាំ២០០៣ ហើយត្រូវប្តូរឈ្មោះមកជា "ធនាគារ អេស៊ីលីដា ភីអិលស៊ី" ។ សូមចុចទីនេះ សម្រាប់ប្រវត្តិនៃការបង្កើនដើមទុន និងភាគហ៊ុនិក របស់ធនាគារ អេស៊ីលីដា ភីអិលស៊ី ។

ក្នុងឆ្នាំ២០២៣ ធនាគារ អេស៊ីលីដា ភីអិលស៊ី កាន់កាប់ទីផ្សារបានប្រមាណ ១៣,៤៥% នៃទីហំទ្រព្យសកម្មសរុប, ១៣,៣៣% (សមតុល្យឥណទាន) និង ៣១,៤១% (ចំនួនឥណទាន) នៃទំហំទីផ្សារឥណទានសរុប, និង ១៦,៨០% (សមតុល្យប្រាក់បញ្ញើ) និង ២៧,៣៦% (ចំនួនគណនី) នៃទំហំទីផ្សារប្រាក់បញ្ញើសរុប នៅក្នុងវិស័យធនាគារនៅក្នុងប្រទេសកម្ពុជា (មិនរាប់បញ្ចូលស្ថាប័នមីក្រូហិរញ្ញវត្ថុ និងអង្គការក្រៅរដ្ឋាភិបាល) ។

បច្ចុប្បន្ន ធនាគារ អេស៊ីលីដា មានទ្រព្យសកម្មសរុប ១០,៤ ពាន់លានដុល្លារអាមេរិក, ប្រាក់បញ្ញើ ៧,៩៨ ពាន់លានដុល្លារអាមេរិក, និងសមតុល្យឥណទាន ៦,៦២ ពាន់លានដុល្លារអាមេរិក នៅលើដៃអតិថិជនជាង ៦១ ម៉ឺននាក់ ដែលក្នុងនោះមាន ៥៥,០៤% ជាស្ត្រី ។ ធនាគារមាន បុគ្គលិកសរុប ១២.២៣៧នាក់ កំពុងបម្រើការងារនៅក្នុង ២៦៥សាខា គ្រប់ខេត្ត-រាជធានីនៃព្រះរាជាណាចក្រកម្ពុជា ។

ក្រៅពីសេវាឥណទាន និងសេវាបញ្ញើ-សន្សំ ធនាគារ អេស៊ីលីដា មានបម្រើជូននូវសេវាផ្ទេរប្រាក់ក្នុង និងក្រៅប្រទេសតាមរយៈ Western Union, MoneyGram, Ria Money Transfer, Thunes និង Swift ។ យើងខ្ញុំមាន សេវាប័ណ្ណ សេវាឌីជីថល សេវាហិរញ្ញប្បទានពាណិជ្ជកម្ម និង សេវាចាត់ចែងសាច់ប្រាក់ និងសេវាធនាគារដទៃជាច្រើនទៀត ។

ការិយាល័យកណ្ដាល របស់ធនាគារ អេស៊ីលីដា មានទីតាំងស្ថិតនៅក្នុងរាជធានីភ្នំពេញ ជាមួយនឹងបណ្ដាញប្រតិបត្តិការគ្របដណ្ដប់ទូទាំងព្រះរាជាណាចក្រកម្ពុជា ។

ប្រវត្តិនៃការពង្រីកបណ្ដាញសាខារបស់ធនាគារ អេស៊ីលីដា
ព្រះរាជាណាចក្រកម្ពុជា
១៩៩៣	ភ្នំពេញ កណ្តាល បន្ទាយមានជ័យ សៀមរាប បាត់ដំបង កំពង់ចាម
១៩៩៤	តាកែវ កំពត កែប
១៩៩៥	ក្រុងព្រះសីហនុ
១៩៩៦	ពោធិ៍សាត់
១៩៩៧	កំពង់ស្ពឺ កំពង់ធំ
២០០០	កំពង់ឆ្នាំង ស្វាយរៀង
២០០១	ព្រៃវែង
២០០៣	កោះកុង
២០០៤	ប៉ៃលិន ឧត្តរមានជ័យ ព្រះវិហារ ក្រចេះ
២០០៥	ស្ទឹងត្រែង
២០០៦	រតនគិរី មណ្ឌលគិរី
សាធារណរដ្ឋប្រជាធិបតេយ្យប្រជាមានិតឡាវ
២០០៨	រដ្ឋធានីវៀងច័ន្ទ សាក់វណ្ណខេត ចំប៉ាសាក់
២០០៩	សាឡាវ៉ាន់
២០១០	ខាំមួន
២០១១	វៀងច័ន្ទ
២០១២	បលីខាំសៃ សេកង លួងផាក់បាង អាត់តាពើ
២០១៣	បកែវ សៃញាក់ប៊ូលី សៀងឃ្វ័ង អ៊ុឌុមសៃ លួងណាំថា
សាធារណរដ្ឋសហភាពមីយ៉ាន់ម៉ា
២០១៣	ភូមិភាគយ៉ាំងកូង ភូមិភាគបាកូ
២០១៩	Mon State
២០២០	Magway Region

តារាងខាងលើបង្ហាញអំពីប្រវត្តិនៃការពង្រីកបណ្ដាញប្រតិបត្តិការរបស់ធនាគារ អេស៊ីលីដា កន្លងមក ដើម្បីពង្រីកការបម្រើសេវាធនាគារជូនចំពោះអតិថិជនគ្រប់ទីកន្លែងទូទាំងព្រះរាជាណាចក្រកម្ពុជា ។

បញ្ជីរាយនាមស្ថាបនិក

ថ្នាក់ដឹកនាំ និងបុគ្គលិកស្ថាបនិកអេស៊ីលីដា ដែលមានរាយនាមតាមលំដាប់អក្ខរក្រមដូចខាងក្រោម បានជួបប្រជុំគ្នា នៅទីភ្នាក់ងារអភិវឌ្ឍន៍សេដ្ឋកិច្ចក្នុងស្រុក ( LEDA ភ្នំពេញ) ខណ្ឌឫស្សីកែវ នៅថ្ងៃទី១៩ ខែមករា ឆ្នាំ១៩៩៣ និងបានប្រារព្ធមហាសន្និបាតដំបូងរបស់អេស៊ីលីដា រួចបានបោះឆ្នោតបង្កើត សមាគមទីភ្នាក់ងារអភិវឌ្ឍន៍សេដ្ឋកិច្ចកម្ពុជា (អេស៊ីលីដា) នៅក្នុងថ្ងៃដដែលនោះ ។

លោក សយ សារឿន
លោក សុខ ចាន់រិទ្ធី
លោក ស៊ុន ប៊ុនថន
លោក សួង សេងហួត
លោក សៅ រឿន
លោក ហុង សេដ្ឋា
លោក ហ៊ឹង ឧសភា
លោក ឡាយ ឆាំ
លោក ឡែម សារុន
លោក អ៊ិន ចាន់នី
លោក អ៊ុង ប៊ុនថន
លោកស្រី អៀង ផល្លា
លោក អ៊ុំ សារិន
លោក ឯក ដន

លោក កែវ ចំរើន
លោក កែវ នព្វរតន៍
លោក ងីម ខេមរិទ្ធ
លោក ឆាយ សឿន
លោក ជាម ទាង
លោកស្រី ដាវ វ៉ាន់ឌី
លោក នៅ សារឿន
លោកស្រី ព្រឿន ម៉ាកព្រេង
លោក ម៉ក់ សុខា
លោកស្រី លី ធីតា
លោក វ៉ាន់ សារឿន
លោក វ៉ឹង ស៊ុនលី
លោក ស រ័ត្ន
លោកស្រី សន សុជាតិ

តារាងកិត្តិយស

យើងខ្ញុំសូមថ្លែងអំណរគុណយ៉ាងជ្រាលជ្រៅ ដល់អង្គការទាំងឡាយដែលបានផ្តល់ការគាំទ្រយ៉ាងសំខាន់ក្នុងការកសាងមូលដ្ឋានគ្រឹះ ដែលធនាគារ អេស៊ីលីដា ភីអិលស៊ី ឈរបានដល់សព្វថ្ងៃនេះ (រៀបតាមលំដាប់អក្សរឡាតាំង) ។

Agence Française de Développement (AFD)
Cambodia Rehabilitation and Regeneration (CARERE)
Deutsche Gesellschaft für Technische Zusammenarbeit (GTZ) GmbH
ក្រសួងសហប្រតិបត្តិការសេដ្ឋកិច្ចនិងអភិវឌ្ឍន៍នៃសហព័ន្ធអាល្លឺម៉ង់ និង Kreditanstalt für Wiederaufbau (KfW)
សាជីវកម្មហិរញ្ញវត្ថុអន្តរជាតិ (IFC) / កម្មវិធីអភិវឌ្ឍន៍វិស័យឯកជនតំបន់ទន្លេមេគង្គ (MPDF)
អង្គការពលកម្មអន្តរជាតិ (ILO)
មូលនិធិ WID នៃប្រទេសជប៉ុន
Programme de Réhabilitation et d'Appui au Secteur Agricole du Cambodge (PRASAC)
ក្រុមហ៊ុនប្រេងឥន្ទនៈសែលកម្ពុជា
ភ្នាក់ងារសហប្រតិបត្តិការអភិវឌ្ឍន៍អន្តរជាតិនៃប្រទេសស៊ុយអែត (SIDA)
រដ្ឋាភិបាលនៃប្រទេសណូវែលសេឡង់
កម្មវិធីអភិវឌ្ឍន៍អង្គការសហប្រជាជាតិ (UNDP)
មូលនិធិសហប្រជាជាតិសម្រាប់ប្រជាជន (UNFPA)
ភ្នាក់ងារអភិវឌ្ឍន៍អន្តរជាតិនៃសហរដ្ឋអាមេរិក (USAID)

ការិយាល័យកណ្តាលអេស៊ីលីដា ចាប់ពីពេលបង្កើតរហូតដល់បច្ចុប្បន្ន

ការិយាល័យកណ្តាល ធនាគារ អេស៊ីលីដា ភីអិលស៊ី
១១ ធ្នូ ២០១៥ - បច្ចុប្បន្ន
អគារលេខ៦១ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ
ការិយាល័យកណ្តាល ធនាគារ អេស៊ីលីដា ភីអិលស៊ី
០៩ មេសា ២០០៧ - ១០ ធ្នូ ២០១៥
អគារលេខ៦១ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ
ការិយាល័យកណ្តាល ធនាគារ អេស៊ីលីដា ភីអិលស៊ី
១៩៩៩ - ០៨ មេសា ២០០៧
អគារលេខ២៨ មហាវិថីម៉ៅសេទុង សង្កាត់បឹងត្របែក ខណ្ឌចំការមន ភ្នំពេញ
ការិយាល័យកណ្តាល សមាគមទីភ្នាក់ងារអភិវឌ្ឍន៍សេដ្ឋកិច្ចកម្ពុជា ស្ថាប័នមីក្រូហិរញ្ញវត្ថុអេស៊ីលីដា
១៩៩៤ - ៣០ សីហា ១៩៩៩
ផ្ទះលេខ២៣២ ផ្លូវលេខ១៦៣ សង្កាត់ទួលទំពូង១ ខណ្ឌចំការមន ភ្នំពេញ
ការិយាល័យកណ្តាល សមាគមទីភ្នាក់ងារអភិវឌ្ឍន៍សេដ្ឋកិច្ចកម្ពុជា អេស៊ីលីដា
១៩៩៣ - ១៩៩៤
ផ្ទះលេខ១៨៦ ផ្លូវលេខ១២២ សង្កាត់ទឹកល្អក់១ ខណ្ឌទួលគោក ភ្នំពេញ
ការិយាល័យកណ្តាល សមាគមទីភ្នាក់ងារអភិវឌ្ឍន៍សេដ្ឋកិច្ចកម្ពុជា អេស៊ីលីដា
១៩៩២ - ១៩៩៣
ខណ្ឌឫស្សីកែវ ភ្នំពេញ

ប្រវត្តិ​ធនាគារ

បញ្ជី​រាយ​នាម​ស្ថាបនិក

តារាង​កិត្តិយស

ការិយាល័យ​កណ្តាល​អេស៊ីលីដា ចាប់​ពី​ពេល​បង្កើត​រហូត​ដល់​បច្ចុប្បន្ន

ប្រវត្តិធនាគារ

បញ្ជីរាយនាមស្ថាបនិក

តារាងកិត្តិយស

ការិយាល័យកណ្តាលអេស៊ីលីដា ចាប់ពីពេលបង្កើតរហូតដល់បច្ចុប្បន្ន