ព័ត៌មានអំពីធនាគារហេតុការណ៍ និងតួលេខអភិបាលកិច្ចសាជីវកម្ម

អភិបាលកិច្ចសាជីវកម្ម

ធនាគារ អេស៊ីលីដា ភីអិលស៊ី ទទួលស្គាល់នូវសារសំខាន់នៃអភិបាលកិច្ចសាជីវកម្ម ដើម្បីគាំទ្រការរីកចម្រើនប្រកបដោយនិរន្តរភាពរបស់ធនាគារ បង្កើនប្រសិទ្ធភាពការងារ បង្កើនតម្លៃរបស់ភាគហ៊ុនិក និងជំនឿទុកចិត្តដល់ភាគហ៊ុនិក អតិថិជន បុគ្គលិក ព្រមទាំងសាធារណជន។ ក្រុមប្រឹក្សាភិបាលគាំទ្រ និងលើកទឹកចិត្តឱ្យអនុវត្តគោលការណ៍អភិបាលកិច្ចសាជីវកម្មល្អ រួមទាំងក្រមសីលធម៌។

កិច្ចប្រជុំភាគហ៊ុនិក

ធនាគារ អេស៊ីលីដា បើកកិច្ចប្រជុំប្រចាំឆ្នាំរបស់ភាគហ៊ុនិក ដោយអនុលោមទៅតាមច្បាប់ និងបទប្បញ្ញត្តិផ្សេងៗ ដែលពាក់ព័ន្ធ និងលក្ខន្តិកៈរបស់ធនាគារ។ ក្នុងឆ្នាំ២០២៣ កិច្ចប្រជុំមហាសន្និបាតភាគហ៊ុនិកសាមញ្ញ បានប្រព្រឹត្តទៅនាថ្ងៃទី២៧ ខែមេសា ឆ្នាំ២០២៣ នៅការិយាល័យកណ្តាលរបស់ធនាគារ អេស៊ីលីដា និងកិច្ចប្រជុំមហាសន្និបាតភាគហ៊ុនិកវិសាមញ្ញ បានប្រព្រឹត្តទៅនាថ្ងៃទី១៨ ខែកញ្ញា ឆ្នាំ២០២៣ តាមរយៈអ៊ីម៉ែល។ ធនាគារបានប្រតិបត្តិដូចខាងក្រោម៖

មុនបើកកិច្ចប្រជុំ

សេចក្តីជូនដំណឹងអំពីកិច្ចប្រជុំ រួមមាន របៀបវារៈលម្អិត តួលេខសំខាន់ៗ សេចក្តីសម្រេច និងអនុសាសន៍របស់ក្រុមប្រឹក្សាភិបាល ព្រមទាំងឯកសារគាំទ្ររបៀបវារៈនីមួយៗ។ សេចក្តីជូនដំណឹង និងឯកសារគាំទ្ររបៀបវារៈនីមួយៗ ត្រូវបានរៀបចំឡើងជាភាសាអង់គ្លេស និងបានផ្ញើជូនភាគហ៊ុនិកទាំងអស់ មុនពេលបើកកិច្ចប្រជុំមហាសន្និបាតភាគហ៊ុនិកសាមញ្ញ និងវិសាមញ្ញ។

អំឡុងពេលប្រជុំ

កិច្ចប្រជុំមហាសន្និបាតភាគហ៊ុនិកសាមញ្ញ និងវិសាមញ្ញប្រចាំឆ្នាំ២០២៣ បានដឹកនាំដោយប្រធានក្រុមប្រឹក្សាភិបាល។ ប្រធានអង្គប្រជុំបានអនុញ្ញាតឱ្យភាគហ៊ុនិកទាំងអស់មានឱកាសគ្រប់គ្រាន់ ដើម្បីសាកសួរ និងផ្តល់អនុសាសន៍ ព្រមទាំងអាចស្នើសុំពន្យល់ ឬបញ្ជាក់បញ្ហាផ្សេងៗ ពីថ្នាក់គ្រប់គ្រង។ ថ្នាក់គ្រប់គ្រង បានបញ្ជាក់ និងឆ្លើយសំណួរទាក់ទងនឹងបញ្ហាដែលពាក់ព័ន្ធនានា។ កំណត់ហេតុប្រជុំ និងមតិអនុម័តដោយការបោះឆ្នោតតាមរបៀបវារៈនីមួយៗ ត្រូវបានកត់ត្រាដោយលេខាធិការក្រុមហ៊ុនរបស់ធនាគារ។

ចំណុចចម្បងៗ ដែលបានអនុម័ត ក្នុងកិច្ចប្រជុំប្រចាំឆ្នាំ២០២៣ មាន៖

អនុម័តការបែងចែកភាគលាភជាសាច់ប្រាក់ចំនួន៤០ភាគរយ នៃប្រាក់ចំណេញក្នុងឆ្នាំ២០២២ ដែលផ្តល់ជូនដល់ភាគហ៊ុនិក របស់ធនាគារ អេស៊ីលីដា ចំនួន៧៤២.៧៦៤.៦៧០.០០០រៀល ស្មើនឹង២៩៧.១០៥.៨៦៤.៩៨៧,៥៨រៀល ក្នុងអត្រា៦៨៥,៨៩៨៥រៀល ក្នុង១ភាគហ៊ុន និងរក្សាប្រាក់ចំណេញនៅសល់ក្នុងខ្ទង់ប្រាក់ចំណេញរក្សាទុករបស់ធនាគារ អេស៊ីលីដា។
អនុម័តគោលការណ៍ភាគលាភ។
អនុម័តការតែងតាំង លោក ឆាយ សឿន ជាអភិបាលធនាគារ អេស៊ីលីដា សម្រាប់អាណត្តិថ្មី រយៈពេល៣ឆ្នាំបន្ថែមទៀត។
អនុម័តការតែងតាំង បណ្ឌិត អ៊ិន ចាន់នី ជាអភិបាលធនាគារ អេស៊ីលីដា សម្រាប់អាណត្តិថ្មី រយៈពេល៣ឆ្នាំបន្ថែមទៀត។
អនុម័តការតែងតាំង លោក វ៉ាន់ ស៊ូអៀង ជាអភិបាលឯករាជ្យ នៅធនាគារ អេស៊ីលីដា រហូតដល់ថ្ងៃចូលនិវត្តន៍ នៅថ្ងៃទី១០ ខែតុលា ឆ្នាំ២០២៣។
អនុម័តការជ្រើសរើស PricewaterhouseCoopers (“PwC”) ជាសវនករឯករាជ្យរបស់ធនាគារ អេស៊ីលីដា សម្រាប់ឆ្នាំហិរញ្ញវត្ថុ ២០២៤។
អនុម័តការដំឡើងប្រាក់បៀវត្សជូនប្រធានក្រុមប្រឹក្សាភិបាលដូចខាងក្រោម៖
- ដំឡើងប្រាក់បៀវត្សជូន លោក ឆាយ សឿន ប្រធានក្រុមប្រឹក្សាភិបាល ដោយទទួលបានចំណាត់ថ្នាក់ “A+” ដែលមានប្រសិទ្ធភាពអនុវត្តប្រតិសកម្ម ចាប់ពីថ្ងៃទី១ ខែមករា ឆ្នាំ២០២៣។
- បូកបន្ថែមអត្រាអតិផរណាប្រចាំឆ្នាំ២០២២ ចំនួន ៣% (បីភាគរយ) លើប្រាក់បៀវត្សរបស់ប្រធានក្រុមប្រឹក្សាភិបាល ដែលមានប្រសិទ្ធភាព ចាប់ពីថ្ងៃទី១ ខែមេសា ឆ្នាំ២០២៣ រហូតដល់ថ្ងៃទី៣១ ខែមីនា ឆ្នាំ២០២៤។
អនុម័តកម្រៃសេវា សម្រាប់ក្រុមប្រឹក្សាភិបាលរបស់ធនាគារ អេស៊ីលីដា ស្របតាមអត្រាអតិផរណាប្រចាំឆ្នាំ២០២២ ចំនួន៣% (បីភាគរយ) ។
អនុម័តកាលបរិច្ឆេទកំណត់ទុកនៅថ្ងៃទី១០ ខែឧសភា ឆ្នាំ២០២៣ សម្រាប់កាលបរិច្ឆេទប្រកាសបញ្ជីឈ្មោះភាគហ៊ុនិក ដែលត្រូវទទួលបានភាគលាភ។
អនុម័តការធ្វើវិសោធនកម្មលើមាត្រា៨ (“ការទិញភាគហ៊ុន”) ឧបសម្ព័ន្ធ១ (“សមាសភាពនៃក្រុមប្រឹក្សាភិបាលរបស់ធនាគារអេស៊ីលីដា”) ឧបសម្ព័ន្ធ៣ (“បញ្ជីឈ្មោះភាគហ៊ុនិកសាធារណៈរបស់ ធនាគារ អេស៊ីលីដា”) និងឧបសម្ព័ន្ធ៤ (“បញ្ជីឈ្មោះភាគហ៊ុនិកដែលធ្វើនិយ័តកម្មពីក្រុមហ៊ុន អេ អេស អេ ភីអិលស៊ី”) នៃលក្ខន្តិកៈ ធនាគារ អេស៊ីលីដា។
អនុម័ត និងតែងតាំង បណ្ឌិត ហេង ឌីណា ជាអភិបាលឯករាជ្យ ធនាគារ អេស៊ីលីដា។
អនុម័ត និងទទួលស្គាល់ការតែងតាំង លោក Takeshi Kimoto ជាតំណាងភាគហ៊ុនិកថ្មី មកពីស្ថាប័ន SMBC នៅធនាគារ អេស៊ីលីដា ជំនួសលោក Hideomi Shigematsu។
អនុម័តការធ្វើវិសោធនកម្ម ឧបសម្ព័ន្ធ១ (“សមាសភាពក្រុមប្រឹក្សាភិបាលធនាគារ អេស៊ីលីដា ភីអិលស៊ី”) នៃលក្ខន្តិកៈ ធនាគារ អេស៊ីលីដា។

បន្ទាប់ពីប្រជុំ

កំណត់ហេតុកិច្ចប្រជុំភាគហ៊ុនិកប្រចាំឆ្នាំ២០២៣ ត្រូវផ្ញើជូនគ្រប់ភាគហ៊ុនិកទាំងអស់ ដើម្បីពិនិត្យ មុននឹងអនុម័តនៅកិច្ចប្រជុំប្រចាំឆ្នាំបន្ទាប់។

ភាគហ៊ុនិក

ភាគហ៊ុនិក គឺជាម្ចាស់របស់ធនាគារ។ ភាគហ៊ុនិកមានសិទ្ធិអនុម័តលើកិច្ចការយុទ្ធសាស្ត្រនានា ប៉ុន្តែពុំមានសិទ្ធិអំណាចគ្រប់គ្រងផ្ទាល់លើកិច្ចការរបស់ធនាគារនោះទេ ដោយភាគហ៊ុនិកបានផ្ទេរការទទួលបន្ទុកទាំងនេះទៅឱ្យក្រុមប្រឹក្សាភិបាល តាមរយៈលក្ខន្តិកៈរបស់ធនាគារ។

សូមចុចទីនេះ សម្រាប់ព័ត៍មានបន្ថែមរបស់ភាគហ៊ុនិក ធនាគារ អេស៊ីលីដា ភីអិលស៊ី