លោក យិន វីរៈ
គណៈប្រធាន​នាយក​ប្រតិបត្តិ​រតនាភិបាល

ជនជាតិខ្មែរ កើតក្នុងខែមករា ឆ្នាំ១៩៨២។ លោក យិន វីរៈ បាន​ចូល​បម្រើការ​នៅ​អេស៊ីលីដា ចាប់តាំង​ពី​ខែឧសភា ឆ្នាំ២០០៣ ជា​បុគ្គលិក​ផ្នែក​ទូទាត់​សាច់ប្រាក់។ បន្ទាប់​មក​លោក​ត្រូវ​បាន​ដំឡើង​តំណែង និង​ធ្វើ​ការ​ក្នុង​មុខតំណែង​គ្រប់គ្រង​ផ្សេងៗ ទាក់ទង​នឹង​កិច្ចការ រតនាភិបាល​អស់​រយៈពេល​ជាង​១៥ឆ្នាំ។ នៅឆ្នាំ២០១៨ លោកត្រូវ​បាន​តែងតាំង​ជា​នាយក​ប្រតិបត្តិ​លេខាធិការ​ក្រុមហ៊ុន និង​បង្ហាញ​ព័ត៌មាន រហូត​ដល់​ឆ្នាំ២០២២។ ក្នុង​ពេល​ថ្មីៗនេះ លោក​ត្រូវ​បាន​ដំឡើង​តំណែង​ជា គណៈប្រធាន​នាយក​ប្រតិបត្តិ​រតនា​ភិបាល ចាប់​ពីថ្ងៃទី១ ខែមករា ឆ្នាំ២០២៣ រហូត​ដល់​បច្ចុប្បន្ន។

ក្នុង​តំណែង​ជា​ គណៈប្រធាន​នាយក​ប្រតិបត្តិ​រតនាភិបាល លោក​ក៏​ជា​សមាជិក​នៃ​គណៈកម្មាធិការ​ប្រតិបត្តិ​របស់​ធនាគារ និង​ទទួល​បន្ទុក​ដឹកនាំ​លើ​កិច្ចការងារ​រតនាភិបាល​ទូទៅ និង​ដឹកនាំ​គ្រប់គ្រង​នាយកដ្ឋាន​ចំនួន១ និង ការិយាល័យ​ចំនួន៣ ក្នុង​នោះ​រួមមាន​នាយកដ្ឋាន​ប្រតិបត្តិការ​ហិរញ្ញវត្ថុ ការិយាល័យ​រតនាភិបាល ការិយាល័យប្រាក់តម្កល់ និងអត្រាប្តូររូបិយប័ណ្ណ និងការិយាល័យរតនពាណិជ្ជកម្ម។ លោកទទួលបន្ទុកគ្រប់គ្រងក្នុងការរៀបចំផែនការយុទ្ធសាស្រ្តសម្រាប់ធនាគារ ដោយអភិវឌ្ឍន៍ និងស្វែងរកមូលនិធិ ផលិតផល/សេវាកម្មរតនាភិបាលថ្មីៗ ព្រមទាំងការធ្វើផែនការ និងការលក់ផលិតផល/សេវាកម្មរតនាភិបាល តាមផែនការ។ លោកទទួលខុសត្រូវក្នុងការដឹកនាំ ការត្រួតពិនិត្យ ការគ្រប់គ្រង និងការវាយតម្លៃប្រតិបត្តិការរតនាភិបាលប្រចាំថ្ងៃរបស់ធនាគារ។

ទំនួលខុសត្រូវផ្សេងទៀតរបស់លោក គឺដើរតួនាទីជាអ្នកគាំទ្រដល់ក្រុមហ៊ុនបុត្រសម្ព័ន្ធរបស់ធនាគារ អេស៊ីលីដា ភីអិលស៊ី ទាក់ទងនឹងកិច្ចការងាររតនាភិបាល។

លោកទទួលបានសញ្ញាបត្រជាន់ខ្ពស់ផ្នែកគ្រប់គ្រងធុរកិច្ចពីសាកលវិទ្យាល័យបញ្ញាសាស្រ្តកម្ពុជា នៅក្នុងឆ្នាំ២០០៩។ លោកក៏បានបញ្ចប់ថ្នាក់បរិញ្ញាបត្រជាន់ខ្ពស់នីតិសាស្ត្រ ឯកទេសនីតិឯកជន ពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ច នៅក្នុងឆ្នាំ២០២២។ លោកបានចូលរួមវគ្គសិក្សាស្តីពី មូលដ្ឋានគ្រឹះនៃកិច្ចការងារលេខាធិការក្រុមហ៊ុន ដែលបានរៀបចំឡើងដោយ Chartered Secretaries Institute of Singapore សហការជាមួយ Accounting and Corporate Regulatory Authority នៅប្រទេសសិង្ហបុរី នៅកំលុងខែមេសា និងឧសភា ឆ្នាំ២០១៩។